ശബ്ദസഞ്ചാരങ്ങൾ

ഉപ്പാൻ്റെ സുഹൃത്ത് ഗൾഫിൽ നിന്ന് കൊണ്ട് വന്ന നാഷണൽ പനാസോണിക്കിൽ ഞങ്ങൾ സ്വന്തം ശബ്ദം റെക്കോർഡ് ചെയ്തു കേൾക്കാൻ ഉന്തും തള്ളുമായി നിന്ന ബാല്യ കുതൂഹലങ്ങൾ എങ്ങനെ മറക്കാനാണ്. ജീവിതത്തിൻ്റെ താളക്രമങ്ങൾ റേഡിയോ ചിട്ടപ്പെടുത്തിയിരുന്നിടത്തേക്കാണ് കാസറ്റ് എന്ന അത്ഭുതമെത്തുന്നത്. ഓല വലിഞ്ഞ് പാട്ടുകളും ശബ്ദങ്ങളും ഇഴഞ്ഞിഴഞ്ഞു നിലയ്ക്കുവോളം അതിനെ വെറുതെ വിട്ടിരുന്നില്ല. ദേശങ്ങളിൽ നിന്ന് കാസറ്റുകൾ പ്രിയരുടെ ശബ്ദവും പേറി കടൽ കടന്നു വരികയും പോവുകയും ചെയ്തു. എഴുതാനും വായിക്കാനും മറ്റുള്ളവരുടെ സഹായം തേടിയിരുന്നവർക്ക് കാസറ്റുകൾ കുറച്ചൊന്നുമല്ല ആശ്വാസമായത്. അവിടെനിന്ന് നമ്മളെത്ര മുന്നോട്ട് പോയിരിക്കുന്നു. സ്മാർട്ട്ഫോണിൽ ലോകം ഒതുങ്ങിയ കാലത്ത് വളരുന്ന മക്കളോട് ഇതൊക്കെ പറഞ്ഞിട്ട് വല്ല കാര്യവുമുണ്ടോ?   

Pic Courtesy: Google Images

പനാസോണിക്കിലൂടെ എൻ്റെ ശബ്ദം തിരിച്ചു കേട്ടപ്പോൾ തോന്നിയ കോരിത്തരിപ്പ് മാത്രമായിരുന്നു ഒക്ടോബറിൽ പോഡ്കാസ്റ്റ് പരീക്ഷിക്കാനുള്ള മുതൽക്കൂട്ട്. പന്ത്രണ്ട് വർഷത്തിനുശേഷം ട്വന്റിട്വന്റിയിലാണ് ദേശാന്തര കാഴ്ചകൾ എന്ന എൻ്റെ ബ്ലോഗിനൊരു കൂടപ്പിറപ്പുണ്ടാവുന്നത്. എന്തെങ്കിലുമൊന്ന് ചെയ്യാതിരിക്കാൻ എന്തൊക്കെ കാരണങ്ങളുണ്ടോ അതെല്ലാം മനസ്സിലേക്ക് സമയാസമയങ്ങളിൽ  ഓട്ടോറിക്ഷ പിടിച്ചെത്തി കാര്യങ്ങൾ നീട്ടി കൊണ്ടുപോയി... സ്ഥിരമായി ഇംഗ്ലീഷ് പോഡ്‌കാസ്റ്റുകൾ കേൾക്കാറുണ്ടായിരുന്നെങ്കിലും മലയാളത്തിൽ ഞാനതിന് തുനിഞ്ഞത് ഇപ്പോഴാണെന്ന് മാത്രം.

പോഡ്‌കാസ്റ്റുകളുമായി ചങ്ങാത്തത്തിലായത് കണ്ണ് ഡോക്ടർ വായന മതിയാക്കാൻ പറഞ്ഞപ്പോഴായിരുന്നു. 'രണ്ടക്ഷരം വായിച്ചൂടെ' എന്ന ചോദ്യം മാത്രം കേട്ട് തഴമ്പിച്ച ചെവിയിൽ പതുക്കെ പല്ലിറുമ്മി കൊണ്ട് ഡോക്ടർ പറഞ്ഞു, "ഒരക്ഷരം വായിക്കരുത്, രണ്ടാഴ്ച കണ്ണിന് പരിപൂർണ്ണ വിശ്രമം". ഞാൻ തളർന്നത് കണ്ടപ്പോൾ ഡോക്ടർ കൂടുതൽ ഉഷാറായി. പുസ്തക വായനയും സ്ക്രീൻ ടൈമും കുറച്ച്, ഓഡിയോ പുസ്തകങ്ങളും, പോഡ്‌കാസ്റ്റുകളും കേൾക്കൂ. കണ്ണുകൾക്ക് വിശ്രമം കൊടുക്കണം... എല്ലാം സമ്മതിച്ചു അണുനാശിനിയിൽ മുങ്ങി നിവർന്ന് ഡോക്ടറുടെ ഓഫീസിൽ നിന്ന് പുറത്തു കടന്നു. 2020  ജൂണിലെ രണ്ടാഴ്ച കാലം ഞാനൊരു മുഴുവൻ സമയ കേൾവിക്കാരിയായി.  

Vintage Collections in London, UK 

1980 കളിൽ തുടക്കം കുറിച്ചെങ്കിലും പോഡ്കാസ്റ്റ് വേരുപിടിച്ചത് 2004 ലാണെന്ന് വിക്കിയിലെ ചരിത്രം പറയുന്നു. വിരലിലെണ്ണാവുന്ന ഇംഗ്ലീഷ് പോഡ്‌കാസ്റ്റുകൾ മാത്രമാണ് ഞാൻ കേട്ടിരുന്നത്.  TED Talks Daily,  6 minute English(BBC), Word of the Day, Oprah's Super Soul Conversations  എന്നിവയായിരുന്നു പ്രിയം. പിന്നെയാണ് പുസ്തകങ്ങളെ സംബന്ധിച്ച പോഡ്‌കാസ്റ്റുകളിലേക്കും, മാതൃഭൂമിയിലും മറ്റും വരുന്ന കഥകളുടെയും കവിതകളുടെയും ഓഡിയോ ക്ലിപ്പുകളിലേക്കും കേൾവി പുരോഗമിച്ചത്. അവസാനമായി നാട്ടിൽ  നിന്ന് പുസ്തകങ്ങളെത്തിയത് ഫെബ്രുവരിയിലാണ്. അതിനുശേഷം കിൻഡിലുമായി നടക്കുമ്പോഴാണ് ഡോക്ടർ ചുകന്ന കൊടി വീശിയത്. അങ്ങനെ വായനയും കേൾവിയിലേക്ക് വഴിമാറി. ഇന്ത്യൻ ഭാഷകളിൽ ഓഡിയോ പുസ്തകങ്ങൾ ലഭിക്കുന്ന സ്റ്റോറി ടെലിൽ ഞാൻ കയറി കൂടി.  പേജുകൾ മണക്കണം, മറിക്കണം, തൊടണം എന്നൊക്കെയുള്ള ശീലങ്ങളോട് ശാരീരിക അകലംപാലിച്ചു. വായനക്ക് പോയ പ്രിയപ്പെട്ട പുസ്തകങ്ങൾ കൂടണയുമോ എന്നാർത്തുള്ള ആധിക്ക്  നല്ല ശമനമുണ്ട്. പിന്നെ, Listening Skill മൊത്തത്തിലൊന്ന് മെച്ചപ്പെട്ടതായും തോന്നുന്നു.

ബ്ലോഗ് പോസ്റ്റുകൾ റെക്കോർഡ് ചെയ്ത് സൂക്ഷിക്കണമെന്ന ആഗ്രഹം ശക്തമായി തോന്നി തുടങ്ങിയിരുന്നെങ്കിലും എങ്ങനെ വേണമെന്ന കാര്യത്തിൽ ഒരു രൂപവുമുണ്ടായിരുന്നില്ല. പണ്ടൊരിക്കൽ ഗൂഗിളിൽ മലയാളം പോഡ്കാസ്റ്റ് തിരഞ്ഞപ്പോൾ കാര്യമായൊന്നും തടയാതിരുന്നതിനാൽ ആ വാതിൽ അടഞ്ഞു തന്നെ കിടന്നു. ദോശ മറിച്ചിടുന്നത് പോലെ ദിവസങ്ങൾ അതിൻ്റെ വഴിക്ക് പോകുന്നതിനിടക്കാണ് ഡൽഹിയിലുള്ള മാധ്യമപ്രവർത്തകനായ എസ് ഗോപാലകൃഷ്ണൻ്റെ Dilli Dali യെന്ന പോഡ്‌കാസ്റ്റിൽ വി. മുസഫർ അഹമ്മദിൻ്റെ മലപ്പുറം മാനിഫെസ്റ്റോ  കേൾക്കാനിടയായത്. 'ഇത് കൊള്ളാലോ' എന്ന് തോന്നിയെങ്കിലും ഞാൻ അനങ്ങിയില്ല. രഹസ്യമായെങ്കിലും പണ്ടത്തെ കാസ്സറ്റുകളിലേക്ക് തന്നെ മനസ്സ് പാഞ്ഞു കൊണ്ടിരുന്നു.  

വിനോദ് നാരായണൻ (ബല്ലാത്ത പഹയൻ) International Podcast ദിനത്തിൽ സോഷ്യൽ മീഡിയയിൽ ഇട്ട പോസ്റ്റിലൂടെയാണ് മലയാളത്തിലെ പോഡ്കാസ്റ്റ് പ്രവണത തിരിച്ചറിയാനായത്.  എന്നോടൊപ്പം, ആശയങ്ങളുടെ വർത്തമാനങ്ങളുമായി എത്തുന്ന Intuition Talk, കേക്കടോ(kaecawdo), Pahayan's Malayalam Podcast, Podcasts by Arabind Chandresekhar, Tent Podcast, Bookaholics, Lifeline, Monkeyfied  തുടങ്ങി നിരവധി പ്രഗത്ഭരുണ്ട്. ടെലിഗ്രാമിലും, ഇൻസ്റ്റാഗ്രാമിലും മലയാളം പോഡ്കാസ്റ്റ് ചാനലും കമ്മ്യൂണിറ്റിയുമുണ്ട്. ഇതിനിടയിലേക്കാണ് ഞാൻ...

ദേശാന്തര കാഴ്ചകളുടെ ആസ്വാദകർക്ക് പരിചയമുള്ള പേരാണ് ചിൽകൂട്ട്. അലാസ്കയിലെ ദിയയിൽ നിന്ന് തുടങ്ങി കാനഡയിലെ ബ്രിട്ടീഷ് കൊളംബിയ പ്രോവിൻസിൽ അവസാനിക്കുന്നതാണ് ചരിത്രപ്രസിദ്ധമായ ചിൽകൂട്ട് ട്രെയിൽ. 33 മൈൽ ദൈർഘ്യമേറിയ ഈ ട്രെയിൽ മുഴവനായി  നടന്നെത്താൻ ഒരാഴ്ചയെങ്കിലും വേണം. ഞങ്ങളാണെങ്കിൽ അതിൻ്റെ അരികിലെത്തിയതുമാണ്. ബക്കറ്റിൽ തന്നെ കിടക്കുന്ന ആ മോഹമാണ് പോഡ്‌കാസ്റ്റിന് പേരായി നൽകിയത്. പേരിടൽ ഒക്ടോബർ ആദ്യവാരത്തിൽ കഴിഞ്ഞെങ്കിലും ആദ്യ എപ്പിസോഡ് Anchor Platformലൂടെ പുറത്തിറങ്ങിയത് October 17 നാണ്. ഇതുവരെ ഞാൻ ചെയ്ത എപ്പിസോഡുകൾ Chilkoot Podcast എന്ന ബ്ലോഗ് പേജിലുണ്ട്. 

ചിൽകൂട്ടിലേക്കായി പുതിയ വിഷയങ്ങളൊന്നും ഇപ്പോൾ ചെയ്യുന്നില്ല. ബ്ലോഗ് പോസ്റ്റുകൾ  തന്നെ പത്ത് മിനിറ്റിനുള്ളിൽ ഒതുങ്ങുന്ന തരത്തിലേക്ക് മാറ്റുകയാണ്. പോഡ്കാസ്റ്റ് കേട്ട്, വായിക്കാൻ താൽപ്പര്യമുള്ളവർക്ക് ഇവിടെക്ക് സ്വാഗതം. ഓരോ എപ്പിസോഡിനുമുള്ള കമന്റുകൾ ആങ്കറിൽ ശബ്ദസന്ദേശമായോ സോഷ്യൽ മീഡിയ വഴിയോ കേൾവിക്കാർക്ക് അറിയിക്കാം. മറ്റ് സാങ്കേതികവിദ്യകൾ ഞാനും പഠിക്കുന്നതേയുള്ളൂ. ആരെങ്കിലും കേൾക്കുമോ എന്ന ചോദ്യത്തിനുത്തരം ഇതേയുള്ളൂ എനിക്ക് പറയാൻ, ബ്ലോഗിലെഴുതാൻ ഇഷ്ടമുള്ളവർ ഇവിടെയുണ്ടാവും അവരെ വായിക്കുന്നവരും. ബ്ലോഗ് പോലെ മറ്റൊരു മാധ്യമമാണ് പോഡ്‌കാസ്റ്റും!

"You just need one person to listen, get your message, and pass it on to someone else. And you've doubled your audience." - Robert Gerrish